गायक देवेन्द्र बब्लुको ‘दि फिरन्ते’ ब्यान्डले पश्चिम नेपालका ६ सहरमा कन्सर्ट गर्ने भएको छ। नयाँ ब्यान्डले पश्चिम नेपाल टुरको घोषणासँगै आफ्नो औपचारिक सुरुवात गरेको हो।

डिसेम्बर ११ अर्थात मंसीर ९ गते दाङको घोराहीमा दि फिरन्ते पहिलो कन्सर्ट गर्नेछ। डिसेम्बर १३ (मंसिर २८) मा कोहलपुर, डिसेम्बर १४ (मंसिर २९) मा नेपालगञ्ज र डिसेम्बर १५ (मंसिर ३०) मा धनगढीमा कन्सर्ट हुने ब्यान्डले जनाएको छ।

त्यसपछि भने टिम बुटवल र पोखरामा कन्सर्ट गर्नेछ। तर, यी ठाउँको मिति भने तय हुन बाँकी छ। मस्ट बि अ जेम्सनको प्रस्तुतिमा यो कन्सर्ट हुन लागेको हो।

गत शनिबार मात्रै देवेन्द्र बब्लु र दि फिरन्ते ब्यान्डले कन्दराको स्वागतमा प्रस्तुति दिएको थियो। जहाँ गायक देवेन्द्रले आफ्नो ब्यान्ड कन्सर्टको लागि तयार भएको बताउँदै छिट्ट फिरन्ते एल्बम ल्याउने समेत बताएका थिए।