मिलेनियम च्यालेन्ज कर्पोरेशनलाई संसदबाट अनुमोदन गराउने विषयमा नेपाल अनिर्णीत भइरहेका बेला परराष्ट्रमन्त्री प्रदीपकुमार ज्ञवाली र संयुक्त राज्य अमेरिकाका विदेशमन्त्री माइकल आर पोम्पेओबीच टेलिफोन संवाद भएको छ।

असार १६ गतेसम्म अनुमोदन गर्नुपर्ने एमसिसी तत्काललाई रोकिएलगत्तै दुई नेताबीच टेलिफोन संवाद भएको हो। तर परराष्ट्र मन्त्रालयले भने दुई नेताबीच कोभिड-१९ महामारीविरूद्ध लड्न अनुभव आदानप्रदान गरेको जनाएको छ। परराष्ट्रका अनुसार टेलिफोन संवादमा ज्ञवालीले कोरोना महामारीका कारण मानव जीवनको क्षतिप्रति सहानुभूति र संवेदना पनि व्यक्त गरेका छन्।

दुवैजनाले एकअर्काका नागरिकलाई प्रदान गरिएको संरक्षण र हेरचाहप्रति एकअर्काका सरकारको सराहना गरेका थिए। संवादमा नेपालको सामाजिक आर्थिक विकासका प्रयासको पूरक रहेको दुई देशबीचको विकास साझेदारीबारे पनि छलफल भएको खुलेको छ।

मन्त्री ज्ञवालीले कोभिड-१९ महामारीसम्बन्धी परियोजनामार्फत अमेरिकी सरकारले नेपालको स्वास्थ्यलगायत अन्य क्षेत्रमा गरेको सहयोगको प्रशंसा गरेको मन्त्रालयद्वारा जारी विज्ञप्तिमा भनिएको छ।

संवादका क्रममा विदेशमन्त्री पोम्पेओले नेपाललाई अमेरिकाको निरन्तर सहयोगको आश्‍वासन दिएका थिए। दुवै पक्षले कोभिड-१९ पछिको सन्दर्भमा वृद्धि हुने स्तरको आर्थिक साझेदारी र सहकार्यमा जोड दिएका छन्।