काठमाडौं । सरकारले विदेशमा अलपत्र परेका नेपालीको ‘उद्धार’ कार्यलाई जारी राखेको छ।

जेठ २३ गतेदेखि असार १३ गते शनिबारसम्म विभिन्न  राष्ट्रबाट  ११ हजार बढी नेपाली स्वदेश फर्किएको त्रिभुवन विमानस्थल कार्यालयले जनाएको छ।

शनिबारसम्म सबैभन्दा बढी कुवेतबाट २ हजार २ जना नेपाली स्वदेश फर्किएका छन् ।

यस्तै युएईबाट २ हजार १७ जना, साउदी अरेबियाबाट १,२१८, मलेसियाबाट ९२१, बगंलादेशबाट ८१५, कतारबाट ६३८, माल्दिभ्सबाट, ६०४, जापानबाट ४९२, अस्ट्रेलियाबाट २६९, बहराइनबाट ४२०, थाइल्याण्डबाट ३२६, ओमानबाट ३१३, अमेरिकाबाट ४८३, दक्षिण कोरिया २२८, सिंगापुरबाट १४६, बेलायत २२९, हङकङबाट ८९, पाकिस्तान ७२, म्यानमारबाट २६ नेपाली स्वदेश फर्किएका छन् ।

यसैगरी  अफगानिस्तानबाट १८ र श्रीलंकाबाट ५ जना गरी ११ हजार ३ सय ३१  नेपाली स्वदेश फर्किएका छन् ।

नेपालीको उद्धारका लागि गैरआवासीय नेपाली संघका विभिन्न मुलुकस्थित राष्ट्रिय समन्वय परिषद्हरुले सहकार्य एवं समन्वय गरेका छन् ।

यस्तै विदेशमा विभिन्न कारण ज्यान गुमाएका तर लकडाउनका कारण नेपाल ल्याउन नपाएका ८७ शव नेपालमा ल्याइएको छ । हालसम्म कतारबाट २० वटा शव नेपाल ल्याइएको छ । यस्तै साउदी अरेबियाबाट २०, मलेसियाबाट ३१, कुवेतबाट ७, युएईबाट ५, बहराइनबाट ३  र ओमानबाट एउटा शव नेपालमा ल्याइएको छ । यस अलावा १२० वटा शव अझै विदेशमै रहेका छन् ।